As ek verslaap is ek gewoonlik kwaad vir myself en dan is ek sommer knorrig en haal dan ongelukkig my frustrasie op my man en my kinders uit.
As jy hiermee kan vereenselwig, luister na hierdie goeie raad van die ou prediker, Charles Spurgeon. Hy het gesê: “Dit is ‘n goeie reël om nooit soggens in die gesig van ‘n mens te kyk voordat jy in die aangesig van God gekyk het nie.”
Die psalmis het dit so gestel: “Ek staan voor dagbreek op en roep om hulp; Ek het my hoop op u woord gevestig” (Ps. 119:147). ‘n Ander vertaling sê “Voor die oggendskemer roep ek al om hulp; op u woorde wag ek.
As jy soggens probleme ondervind om vriendelik teenoor ander te wees, is die antwoord dalk om vroeg genoeg op te staan om eers alleen met God te wees. Vra Hom vir sy hulp. Laat die aangesig van God die eerste een wees wat jy sien.
Jy sal dalk verbaas wees oor hoe dit die manier waarop jy deur die dag met ander mense kommunikeer, verander.
Seëngroete van ROHSA