Dit gebeur nogal maklik – jy lees ‘n skrifgedeelte, maar voor jy jou kan kry het jou gedagtes afgedwaal en het jy nie ‘n idee wat jy gelees het nie.
As jy dit moeilik vind om te konsentreer wanneer jy jou Bybel lees, hier is vir jou ‘n voorstel wat ek self beoefen. Skryf die antwoorde op hierdie drie vrae neer by elke Bybelhoofstuk:
Wat sê dit?
Wat beteken dit?
Wat moet ek doen?
“Wat sê dit?” fokus op die letterlike woorde of inhoud, terwyl “wat beteken dit?” die betekenis, interpretasie of implikasie ondersoek.
Wanneer jy ‘n Skrifgedeelte so hanteer gaan jy agterkom dat jou oë die woorde lees: Byvoorbeeld Kolossense 1:17 “Voor alles was Hy al daar, en deur Hom bly alles in stand. Hy is die hoof van die liggaam, van die kerk. Hy is die oorsprong daarvan, Hy is die Eerste, die Een wat uit die dood opgestaan het, sodat Hy die eerste plek in die heelal inneem.”
Dadelik gaan jou gedagtes dit interpreteer, en dan dink jy dalk iets soos:
“Paulus sê dat Jesus betrokke was by verlossing en skepping. Ek het nooit besef dat Jesus so ‘n groot rol daarin gespeel het nie.”
Sien jy kans om dit te probeer?
Seëngroete van ROHSA