Lees jy ooit die Bybel om eintlik net jou gewete te sus en nog ‘n takie op jou lys af te merk? Ek het ‘n manier gevind om my te help om God se Woord dieper te verstaan en toe te pas: Ek vra God vir Sy hulp. Dan kan ek onthou wat ek gelees het, want te maklik vergeet ek wat ek selfs die oggend nog gelees het.
Voordat ek die Bybel lees, bid ek graag hierdie woorde uit Psalm 119: “Wees goed vir u dienaar sodat ek mag lewe en u woord gehoorsaam. Maak oop my oë sodat ek die wonders kan sien wat opgeskryf is in u gebooie.” (Vers 17 & 18)
Wanneer ek dit bid, vra ek die Skrywer van die Woord om my te help verstaan wat Hy bedoel. Ek maak ook ‘n verbintenis. Ek sê vir die Here: “Praat asseblief met my. Wat U ook al sê, of ek daarvan hou of nie, of dit maklik of moeilik is, of dit pas by my vooropgestelde idees of nie, deur U genade en U krag, sal ek gehoorsaam wees daaraan.”
Volgende keer wanneer jy met jou Bybel gaan sit om te lees, onthou om God in die oomblik te betrek. Deur Hom te vra om jou oë oop te maak en jou te help om dit te verstaan en dan ook om dit toe te pas.
Seëngroete van ROHSA