Voel jy ook soms dat daar ‘n afstand gekom het tussen jou en God, dat jy nie so naby aan Hom is as voorheen nie? Dalk het daar iets gebeur wat jou laat huiwer. Wat dit dan nog erger maak, is dat jy ongemaklik en skuldig voel wanneer jy probeer bid… dan hou jy eerder net op! Indien jy al so gevoel het, weet jy is nie die eerste een om so te voel nie.
Adam en Eva het ‘n intieme verhouding met God gehad, maar hulle gemeenskap met Hom is deur sonde verbreek. Genesis 3:8 vertel ons: “Hulle het gehoor hoe die Here God in die tuin wandel teen die tyd dat die aandwind opkom, en die mens en sy vrou het vir die Here God weggekruip tussen die bome van die tuin.”
Maar dankie tog, daar was hoop! God het ‘n dier geoffer om vir Adam en Eva klere te maak – ‘n simbool van die uiteindelike offer wat Christus vir ons aan die kruis gebring het. As gevolg van Christus se dood, kan ons verhouding herstel word in gemeenskap met God, dit maak nie saak hoe ver ons weggedryf het nie.
Indien jy voel dat jy ver van God af is, wat weerhou jou om nou terug draai na Hom toe? Vertrou die offer wat Christus gemaak het en spandeer weer tyd saam met jou Hemelse Vader – die Een wat nooit sal ophou om jou lief te hê nie.
Seëngroete van ROHSA